Hong Kong

Í þriðja þætti er fjallað um mótmælahreyfinguna í Hong Kong sem byrjaði í júni á síðasta ári. Kveikjan að mótmælunum var umdeilt framsalsfrumvarp sem var sett fram af heimastjórninni í Hong Kong. Frumvarpið varð strax mjög umdeilt fyrir að heimila framsal á afbrotamönnum í Hong Kong til meginlands Kína. Með tímanum þróuðust mótmælin yfir í kröfur um auknar lýðræðisumbætur og sjálfstæða rannsókn á aðgerðum lögreglunnar gegn mótmælendum. Til þess að skyggnast betur inn í hugarheim mótmælenda ræddum við við aktívistann Glacier Kwong um mótmælahreyfinguna og hvernig hin nýju öryggislög hröktu hana frá Hong Kong. Við ræddum einnig við Simon Shen, prófessor í alþjóðastjórnmálafræði við Kínverska Háskólann í Hong Kong, um öryggislögin og hvernig spennan á milli Bandaríkjanna og Kína hefur haft áhrif á sjálfstjórnarhéraðið Hong Kong. Umsjón: Alda Elísa Andersen og Guðbjörg Ríkey Thoroddssen Hauksdóttir.